پنجاب و کے پی میں انتخابات ملتوی کرنے کیخلاف درخواستوں پر بنچ تشکیل، سماعت کچھ دیر میں ہوگی

اسلام آباد: چیف جسٹس کی سربراہی میں لارجر بینچ پنجاب اور کے پی میں انتخابات کے معاملے میں دائر درخواستوں پر کچھ دیر میں سماعت کرے گا۔ذرائع کے مطابق پنجاب اور کے پی انتخابات کے معاملے میں چیف جسٹس پاکستان نے دائر درخواستوں پر سماعت کے لیے بینچ تشکیل دے دیا۔ چیف جسٹس پاکستان جسٹس عمر عطا بندیال کی سربراہی میں پانچ رکنی لارجر بینچ آج ہی سماعت کرے گا۔بینچ میں جسٹس اعجاز الاحسن، جسٹس منیب اختر، جسٹس امین الدین خان اور جسٹس جمال خان مندوخیل شامل ہیں۔واضح رہے کہ تحریک انصاف نے پنجاب اور خیبر پختون خوا میں انتخابات ملتوی کرنے کے الیکشن کمیشن اور گورنر کے پی، کے فیصلوں کے خلاف سپریم کورٹ سے رجوع کیا ہے۔
پی ٹی آئی کی جانب سے الیکشن تاریخ کی تبدیلی کے خلاف اسپیکر پنجاب اسمبلی سبطین خان، اسپیکر کے پی کے اسمبلی مشتاق غنی نے آئینی درخواست دائر کی۔ تحریک انصاف، سیکریٹری اسد عمر، میاں محمود الرشید اور عبد الرحمان بھی مشترکہ درخواست گزاروں میں شامل ہیں۔آئینی درخواست میں وفاق، پنجاب، کے پی کے، وزارت پارلیمانی امور، وزارت قانون اور کابینہ کو فریق بنایا گیا ہے۔تحریک انصاف نے مشترکہ درخواستوں میں موقف اختیار کیا ہے کہ الیکشن کمیشن نے آئینی مینڈیٹ اور عدالت کے فیصلے سے انحراف کیا، الیکشن کمیشن کا فیصلہ کالعدم قرار دیا جائے، الیکشن کمیشن کو شیڈول کے مطابق 30 اپریل کو الیکشن کرانے کا حکم دیا جائے۔