کراچی: سرجانی کے علاقے میں نجی سوسائٹی سے ایک شخص کا ڈھانچہ ملا ہے ، ڈھانچہ گرفتار ملزم کی نشاندہی پر برآمد کیا گیا ہے ۔
تفصیلات کے مطابق سائٹ سپر ہائی وے تھانے میں گرفتار ملزم عبدالمالک کی نشاندہی پر پولیس نے کارروائی کرتے ہوئے سرجانی سے باقر نامی شہری کا ڈھانچہ برآمد کیا گیا ہے ۔
ایس ایچ او سرجانی اخلاق احمد نے بتایا کہ سائٹ سپر ہائی وے پولیس نے ایک اسٹریٹ کرمنل کو گرفتار کیا جس کا نام عبدالمالک بتایا گیا ہے۔
ملزم نے تفتیش میں انکشاف کیا ہے کہ اُس نے اپنے رشتہ دار باقر کے ساتھ مل کر 18 لاکھ روپے کی ڈکیتی کی تھی مگر رقم کے تنازعے پر ملزم نے فائرنگ کرکے باقر کو قتل کردیا تھا اور لاش کو سرجانی کے علاقے میں دفنا دیا تھا جس کا مقدمہ اغواء برائے تاوان کی دفعات کے تحت سائٹ سپر ہائی وے تھانے میں درج ہے ۔
ملزم کی نشاندہی پر لاش برآمد کرکے تفتیش شروع کردی گئی ہے