وزیر اعظم شہباز شریف نے کہا ہے کہ دانش اسکولز اور دانش یونیورسٹی کی تعمیر میں ڈیجیٹل اور جدید کلاس رومز پر زیادہ سرمایہ کاری کی جائے، بطور خادم پاکستان قوم کے بچوں کو بین الاقوامی معیار کی تعلیم و تربیت اپنی اولین ذمہ داری سمجھتا ہوں۔
شہباز شریف کی زیر صدارت ملک بھر میں دانش اسکولز اور اسلام آباد میں دانش اسکولز یونیورسٹی کی تعمیر کے حوالے سے پیش رفت پر جائزہ اجلاس منعقد ہوا۔
اجلاس کو بتایا گیا کہ کُری اسلام آباد میں دانش اسکول کی تعمیر پر کام تیزی سے جاری ہے جس کو راوں برس کے اختتام تک مکمل کر لیا جائے گا۔
گلگت بلتستان میں سلطان آباد، گھانچے اور استور میں دانش اسکولز کی تعمیر پر بھی کام تیزی سے جاری ہے جن پر کام آئندہ برس مکمل کر لیا جائے گا۔
آزاد کشمیر میں باغ اور بھمبر میں دانش اسکولز پر کام شروع ہوچکا جبکہ شاردہ، نیلم میں دانش اسکول کا پی-سی ون منظور ہوچکا اور تعمیری کام جلد شروع کر دیا جائے گا۔
اجلاس کو بتایا گیا کہ بلوچستان میں سبی، موسی خیل، ژوب، قلعہ سیف اللہ اور ڈیرہ بگٹی میں دانش اسکولز کا پی-سی ون منظور ہو چکا جبکہ حب میں دانش اسکولز کی تعمیر کی فیزیبلٹی پر کام جاری ہے۔
اجلاس کو بتایا گیا کہ چترال، کراچی اور ٹنڈو محمد خان میں دانش اسکولز کی تعمیر کیلئے زمین کا انتخاب ہوچکا ہے جبکہ انکی فیزیبلٹی اور دیگر اقدمات پر کام تیزی سے جاری ہے۔
اجلاس کو ایبٹ آباد اور وزیرِستان میں دانش اسکولز کی تعمیر کی تجاویز اور راجن پور میں یونیورسٹی کے حوالے سے پیش رفت پر بھی آگاہ کیا گیا۔
دانش اسکولز یونیورسٹی پر پیش رفت سے آگاہ کرتے ہوئے اجلاس کو بتایا گیا کہ یونیورسٹی کی ٹیکنو فیزیبلٹی پر کام تیزی سے جاری ہے جسے جولائی کے اختتام تک مکمل کر لیا جائے گا جب کہ ماسٹرپلان، ڈیزائن اور تعمیر کیلئے 12 بین الاقوامی فرمز میں سے 7 درکار معیار پر پوری اتری ہیں اور پرکیورمنٹ کمیٹی اسکو حتمی شکل دے رہی ہے۔
عالمی معیار کے ڈگری پروگرامز، داخلوں کی تفصیلات اور الائیڈ سہولیات کو حتمی شکل دی جارہی ہے۔
اجلاس کے دوران وزیرِ اعظم نے ہدایت کی کہ دانش اسکولز یونیورسٹی میں عمارتوں کو سادہ جبکہ کلاس رومز میں جدید سافٹ ویئر، ڈیجیٹل ایکویپمنٹ، جدید لیبز اور عصر حاضر کی ٹیکنالوجی پر سرمایہ کاری کو مرکزی اہمیت دی جائے۔
انہوں نے کہا کہ دانش اسکولز اور دانش یونیورسٹی کی تعمیر میں ڈیجیٹل اور جدید کلاس رومز پر زیادہ سرمایہ کاری کی جائے، بطور خادم پاکستان قوم کے بچوں کو بین الاقوامی معیار کی تعلیم و تربیت اپنی اولین ذمہ داری سمجھتا ہوں۔
وزیرِ اعظم نے کہا کہ دانش اسکولز میں اساتذہ کو بہترین پیکیج فراہم کیا جائے، اساتذہ اور اسٹاف کی بھرتیوں میں شفافیت اور میرٹ کو مرکزی اہمیت دی جائے، آزاد کشمیر اور گلگت بلتستان میں دانش اسکولز کی تعمیر پر کام کو تیز کیا جائے۔
انہوں نے کہا کہ دانش اسکولز، یونیورسٹی میں عالمی معیار کے جدید علوم کی تعلیم پر توجہ مرکوز کی جائے۔
شہباز شریف نے کہا اللہ کے فضل و کرم سے پنجاب میں دانش اسکولز کی صورت جو پودا لگایا تھا وہ تناور درخت بن چکا، غریب و متوسط طبقے کے سیکڑوں طلباء دانش اسکولز سے فارغ التحصیل ہوکر دنیا بھر میں اپنی صلاحیتوں کو لوہا منوا رہے ہیں۔
وزیرِ اعظم نے کہا کہ دانش اسکولز سے معاشی طور پر کمزور طبقے کے بچوں کی خدمت کا جو خواب دیکھا، اللہ کے بے پایاں فضل سے وہ شرمندہ تعبیر ہو رہا ہے، پورے ملک میں دانش اسکولز کے قیام سے ہزاروں بچے مستفید ہوں گے۔
شہباز شریف نے کہا کہ ہر طبقے کو اعلی تعلیم و تربیت کے یکساں مواقع کی فراہمی کیلئے ہمیشہ کوشاں رہوں گا۔
اجلاس میں وفاقی وزراء احسن اقبال، اعظم نذیر تارڑ، احد خان چیمہ، خالد مقبول صدیقی، چیئرمین وزیرِ اعظم یوتھ پروگرام رانا مشہود احمد خان، چیف کوارڈینیٹر مشرف زیدی، متعلقہ اعلی حکام نے شرکت کی۔
چاروں صوبوں بشمول گلگت بلتستان اور آزاد کشمیر کے چیف سیکریٹریز و نمائندوں نے ویڈیو لنک کے ذریعے اجلاس میں شرکت کی۔