اسلام آباد:پاکستان نے ملکی ایئرلائنز کو ایئرسیفٹی لسٹ سے نکالنے (پابندیاں ختم کرنے) کے فیصلے پر برطانیہ کا خیر مقدم کرتے ہوئے شکریہ ادا کیا ہے۔
ترجمان دفتر خارجہ کے مطابق پاکستان اور اس کی فضائی کمپنیوں کو برطانیہ کی ایئر سیفٹی لسٹ سے نکالنے کا فیصلہ خوش آئند ہے۔پاکستان نے برطانیہ کی ایئر سیفٹی کمیٹی کی جانب سے پاکستانی ایئرلائنز کو ایئر سیفٹی لسٹ سے نکالنے اور 5 سال بعد برطانیہ کے لیے کمرشل پروازوں کی بحالی کی اجازت دینے کے فیصلے کا خیرمقدم کیا ہے۔
انہوں نے اپنے بیان میں کہا کہ یہ تاریخی فیصلہ پاکستان کی گزشتہ برسوں کے دوران جاری سفارتی و تکنیکی کوششوں کا ثمر ہے، جس سے پاکستان کی بین الاقوامی ایوی ایشن سیفٹی کے اعلیٰ ترین معیار پر کاربند رہنے کے عزم کی تصدیق ہوتی ہے۔
ترجمان کے مطابق اس پابندی کا خاتمہ پاکستان اور برطانیہ کے درمیان فضائی رابطوں کی بحالی کی جانب ایک اہم پیش رفت ہے، جو برطانیہ میں مقیم 17 لاکھ سے زائد پاکستانیوں کے لیے نہایت خوش آئند ہے۔ اس فیصلے سے خاندانی روابط، کاروبار، سیاحت اور تجارتی سرگرمیوں کو نمایاں تقویت ملے گی۔
دفتر خارجہ کا کہنا ہے کہ پاکستان نے برطانیہ کا شکریہ ادا کرتے ہوئے اس فیصلے کو پاکستان کے عزم اور تعاون پر مبنی عمل کا اعتراف قرار دیا ہے اور امید ظاہر کی ہے کہ دونوں ممالک کے درمیان باہمی اعتماد اور شراکت داری مزید مضبوط ہوگی۔