راولپنڈی:زمینوں کے تنازعات اور دیگر مخالفت پر فائرنگ کے نتیجے میں 2 بھائیوں سمیت 4 افراد قتل کردیے گئے۔
وفاقی دارالحکومت کے جڑواں شہر راولپنڈی کے تھانہ کہوٹہ کی حدود میں واقع بھون روڈ پر پیش آنے والے واقعے میں 2 سگے بھائیوں سمیت 4 افراد کو فائرنگ کر کے قتل کر دیا گیا۔
پولیس کے مطابق مقتولین کی شناخت جنید گل، متین کیانی، شعیب اور ثمر اقبال کے ناموں سے ہوئی ہے، جن میں سے ثمر اقبال اور جنید اقبال آپس میں بھائی تھے۔
چاروں افراد ایک ہی گاڑی میں سوار ہو کر جا رہے تھے کہ اچانک مخالفین، جن میں بہادر وغیرہ شامل ہیں، نے ان پر اندھا دھند فائرنگ کر دی، جس کے نتیجے میں چاروں افراد موقع پر ہی دم توڑ گئے۔
واقعے کی اطلاع ملتے ہی ایس پی صدر راولپنڈی نبیل کھوکھر پولیس ٹیم کے ہمراہ موقع پر پہنچے اور جائے وقوع سے فرانزک شواہد اکٹھے کر لیے۔ انہوں نے بتایا کہ فریقین کے درمیان زمین کے پرانے تنازعات چلے آ رہے تھے جو کہ اسلام آباد کے علاقے سہالہ سے جڑے ہوئے تھے۔
نبیل کھوکھر کے مطابق قتل کی واردات میں ملوث دونوں گروپوں کے افراد راولپنڈی اور اسلام آباد پولیس کو سنگین مقدمات میں پہلے سے ہی مطلوب تھے۔
پولیس نے جائے وقوع سے تمام ضروری شواہد اکٹھے کر کے مقدمہ درج کرکے تفتیش شروع کردی ہے اور ملزمان کی گرفتاری کے لیے ٹیمیں تشکیل دے دی گئی ہیں۔
دوسری جانب آئی جی پنجاب نے واقعے کا نوٹس لیتے ہوئے آر پی او راولپنڈی سے تفصیلی رپورٹ طلب کر لی ہے۔ انہوں نے ہدایت کی ہے کہ اس سفاک واردات میں ملوث تمام ملزمان کو فوری گرفتار کیا جائے اور ان کی گرفتاری کے لیے تمام وسائل بروئے کار لائے جائیں