پاکستان شوبز کے سینئر اداکار محسن گیلانی نے انکشاف کیا ہے کہ اداکارہ عائشہ خان اور حمیرا اصغر سے قبل بھی کئی برسوں پہلے ایک مشہور شوبز شخصیت کی لاش کراچی کے فلیٹ سے برآمد ہوئی تھی۔
اداکار محسن گیلانی نے حال ہی میں ایک پوڈکاسٹ میں گفتگو کرتے ہوئے یہ انکشاف کیا ہے کہ پاکستان کے معروف ہدایت کار جاوید فاضل کی لاش بھی ان کے فلیٹ سے برآمد ہوئی تھی، جسے دروازہ توڑ کر نکالا گیا۔ یہ انکشاف حالیہ دنوں اداکارہ عائشہ خان اور حمیرا اصغر کی فلیٹس سے لاشیں ملنے کے تناظر میں سامنے آیا ہے۔
محسن گیلانی نے بتایا کہ جاوید فاضل شوبز انڈسٹری کا ایک سینئر اور معتبر نام تھے، جنہیں شاید آج کے لوگ بھول چکے ہوں۔ انہوں نے بتایا کہ جاوید فاضل ایک روز رات دیر تک شوٹنگ کے بعد اپنے فلیٹ واپس لوٹے لیکن اگلے دن سیٹ پر نہیں پہنچے۔ پہلے تو ساتھی فنکاروں نے تاخیر کو معمول کا حصہ سمجھا، لیکن کافی وقت گزرنے کے بعد جب پروڈیوسر نے ان سے رابطہ کرنے کی کوشش کی تو جواب نہ ملا۔
محسن گیلانی نے بتایا کہ جاوید فضل کو تلاش کرنے کی مزید کوشش پر معلوم ہوا کہ وہ ناشتہ کرنے بھی نہیں آئے، جس کے بعد دروازہ توڑ کر ان کے فلیٹ میں داخل ہونا پڑا۔ اندر جاوید فاضل کی لاش موجود تھی۔ ان کا انتقال 2010 میں کراچی کے علاقے ڈیفنس میں واقع ان کے فلیٹ میں ہوا تھا، جہاں وہ اکیلے رہائش پذیر تھے۔
یاد رہے کہ کچھ دنوں قبل پاکستان کی سینئر اداکارہ عائشہ خان اور اداکارہ و ماڈل حمیرا اصغر کی لاش بھی ان کے فلیٹ سے برآمد ہوئی تھی جس نے پوری انڈسٹری کو غمزدہ کردیا تھا۔