عالمی شہرت یافتہ پاکستانی گلوکار عاطف اسلم نے والد کے انتقال کے بعد کانسرٹ میں پرفارم کرنے پرتنقید کرنے والوں کو جواب دے دیا۔
گزشتہ ماہ عاطف اسلم کے والد لاہور میں انتقال کرگئے تھے، والد کے انتقال کے اگلے ہی دن گلوکار نے کراچی کے کرکٹ اسٹیڈیم میں یومِ آزادی کی مناسبت سے منعقدہ کانسرٹ میں پرفارم کیا تھا۔
ایک جانب گلوکارکے مداحوں کی جانب سے خوب سراہتے ہوئے کہا گیا کہ عاطف اسلم والد کے انتقال کے باوجود اپنی پیشہ ورانہ ذمہ داریوں سے پیچھے نہیں ہٹے جبکہ دوسری جانب گلوکار کو تنقید کا نشانہ بھی بنایا گیا۔
یہ بھی پڑھیں
بالی وڈ میں پرفارم کرنا یاد آتا ہے: عاطف اسلم
معروف گلوکار عاطف اسلم کے والد محمد اسلم انتقال کرگئے
سعودیہ میں کنسرٹ کرنے یا نہ کرنے کا کوئی بیان نہیں دیا، عاطف اسلم کا لاتعلقی کا اظہار
عاطف اسلم ان دنوں اپنے کانسرٹس کے سلسلے میں کینیڈا میں موجود ہیں جہاں انہوں نے کینیڈا میں مقیم بھارتی میزبان اور صحافی فریدون شہریار کو انٹرویو دیا اور تنقید کرنے والوں کو آڑے ہاتھوں لے لیا۔
گلوکار نے کہا کہ میرے والد کے انتقال کے بعد سب نے باتیں کیں اور کہا یہ اگلے ہی روز پرفارم کررہا ہے، میرے گھر میں کیا ہورہا ہے اس سے ان لوگوں کا چینل چل رہا ہے۔
انہوں نے مزید کہا کہ میرا کام نہیں ہے کہ میں دوسروں کو بتاؤں کہ کیا کرنا ہے یا نہیں، میں پوری دنیا کے ساتھ رشتہ داری نہیں کر سکتا، میرا کام آرٹ ہے، مجھے میرے آرٹ کیلئے پسند کریں اور موسیقی کیلئے مجھ سے نفرت کریں، مجھے یہ نہیں بتائیں کہ میں نے کیا کرنا ہے۔
