اسلام آباد:(روزنامہ جرأت) وفاقی وزیر برائے اطلاعات و نشریات عطا اللّٰہ تارڑ نے اعلان کیا ہے کہ نیوز کاسٹر عشرت فاطمہ اب بطور مینٹور پاکستان ٹیلی ویژن (پی ٹی وی) کا حصہ بنیں گی۔عطا تارڑ نے یہ اعلان اسلام آباد میں عشرت فاطمہ کی رہائش گاہ پر ان کے ہمراہ میڈیا سے گفتگو کرتے ہوئے کیا۔اس موقع پر عطا تارڑ اور عشرت فاطمہ کے ہمراہ وفاقی سیکریٹری اطلاعات و نشریات اشفاق احمد خلیل، وزیراعظم کے میڈیا کوآرڈینیٹر بدر شہباز اور پرنسپل انفارمیشن آفیسر مبشر حسن بھی موجود تھے۔
انہوں نے پاکستان ٹیلی ویژن (پی ٹی وی) میں بطور ماہر اور سرپرست کی حیثیت سے دوبارہ شمولیت کی درخواست قبول کرنے پر عشرت فاطمہ کا شکریہ ادا کیا۔عطا تارڑ نے کہا کہ عشرت فاطمہ کی مہارت نئے آنے والوں کو مختلف حالات میں خبریں پڑھنے اور نشر کرنے کے فن کی تربیت دینے میں انمول ثابت ہوگی، وہ ایک تجربہ کار نیوز کاسٹر ہیں اور ان کا کیرئیر شاندار ہے۔
انہوں نے مزید کہا کہ ہر پاکستانی نے عشرت فاطمہ کی آواز کو پہچانا کیونکہ وہ ساڑھے 4 دہائیوں سے زائد عرصے سے قوم کی خدمت کر رہی ہیں، ریڈیو پاکستان سے ریٹائرمنٹ کے بعد میں نے ذاتی طور پر ان سے درخواست کی کہ وہ نئی نسل کی تربیت اور اردو زبان کو فروغ دینے کے لیے پی ٹی وی سے منسلک ہوں، عشرت فاطمہ کی واپسی ہم سب کی حوصلہ افزائی کرے گی اور پی ٹی وی کو بطور ادارہ مضبوط بنائے گی۔اس موقع پر عشرت فاطمہ نے میڈیا سے بات کرتے ہوئے کہا کہ خبریں پڑھنا میرا جنون ہے اور میں یہ اس نئی ذمہ داری سے نوازنے پر وفاقی وزیر برائے اطلاعات و نشریات کا شکریہ ادا کرتی ہوں، میں نوجوان نسل کو پڑھانے اور ادارے کی بہتری کے لیے اپنا کردار ادا کرنے کی منتظر ہوں۔
عشرت فاطمہ نے حکومت پر زور دیا کہ وہ ہر شعبے میں قابل افراد کی حوصلہ افزائی جاری رکھے۔
