لاہور:پاکستان کی 28 نومبر سے بھارت میں شیڈول جونیئر ہاکی ورلڈ کپ میں عدم شرکت کا امکان ہے۔
انٹرنیشنل ہاکی فیڈریشن نے جونیئر ورلڈ کپ میں کوالیفائی کرنے والی ٹیموں کو مختلف پولز میں تقیسم کررکھا ہے جس میں پاکستان اور بھارت ایک ہی پول میں ہیں۔
ذرائع کے مطابق ایشیا ہاکی کپ میں قومی ٹیم کو شرکت کیلئے این او سی نہ دینے کے حوالے سے پی ایچ ایف حکام کوآگاہ کیا جاچکا ہے۔
پی ایچ ایف حکام نے ایشین ہاکی فیڈریشن کو حکومتی اجازت سے مشروط کرتے ہوئے اپنی ٹیم کی دستیابی دی تھی۔
یہ بھی اطلاعات ہیں کہ ہاکی کے ساتھ دوسری کسی ٹیم کو بھی بھارت کی سرزمین پر ہونے والے ایونٹ کے لیے این او سی جاری نہیں ہوگا۔
پاکستان کے بعض ہاکی اولمپئِنز نے بھی مطالبہ کر رکھا ہے کہ ایشیا کپ کے ساتھ جونیئر ورلڈکپ کو بھی کسی نیوٹرل مقام پر منتقل کیا جائے۔
یاد رہے کہ اس سے قبل پاکستان نے سیکیورٹی خدشات کو دیکھتے ہوئے ایشیا کپ کے لیے ہاکی ٹیم کو بھارت نہ بھیجنے کا فیصلہ کیا تھا۔
ذرائع کے مطابق پاکستان نے ہمیشہ کھیلوں کو ملکی سیاستوں سے بالا تر رکھا ہے لیکن بھارت نے کھیلوں کو سیاست کی نظر کیا اور متنازعہ بنایا۔
بھارتی میڈیا پاکستان کے خلاف زہر اگل رہا ہے۔ انتہا پسند تنظیم مختلف سوشل میڈیا اکاؤنٹس سے پاکستان ہاکی ٹیم کو کھلم کھلا دھمکیاں دے رہی ہے۔
ذرائع کے مطابق موجودہ صورتحال، تعلقات کی کشیدگی اور ٹیم کو لاحق سیکیورٹی خدشات کو دیکھتے ہوئے کھلاڑیوں کو نہیں بھیجا جاسکتا۔