اوپن اے آئی نے اپنا سب سے کم قیمت سبسکرپشن پلان چیٹ جی پی ٹی گو پاکستان سمیت ایشیا کے مزید 16 ممالک میں متعارف کرا دیا ہے۔
چیٹ جی پی ٹی کے سربراہ نک ٹورلے نے سوشل میڈیا پلیٹ فارم ایکس (ٹوئٹر) پر اس کا اعلان کیا۔
انہوں نے کہا کہ صارفین کی جانب سے چیٹ جی پی ٹی کو زیادہ سستا بنانے کا مطالبہ کیا جا رہا تھا۔
آرٹی فیشل انٹیلی جنس (اے آئی) کمپنی نے چیٹ جی پی ٹی گو کو کچھ عرصے قبل سب سے پہلے بھارت اور انڈونیشیا میں متعارف کرادیا گیا۔
چیٹ جی پی ٹی تیار کرنیوالی کمپنی اسمارٹ فونز کے مقابلے پر کونسی اے آئی ڈیوائس تیار کر رہی ہے؟
چیٹ جی پی ٹی میں صارفین کیلئے ایک اہم تبدیلی کر دی گئی
اب اوپن اے آئی کی جانب سے پاکستان سمیت افغانستان، بنگلادیش، بھوٹان، برونائی، کمبوڈیا، لاؤس، ملائیشیا، مالدیپ، میانمار، نیپال، فلپائن، سری لنکا، مشرقی تیمور اور ویتنام میں چیٹ جی پی ٹی گو کو متعارف کرایا گیا ہے۔
اوپن اے آئی کے مطابق چیٹ جی پی ٹی گو کو متعارف کرانے کا مقصد کمپنی کے نئے ماڈل جی پی ٹی 5 تکصارفین کی رسائی کو بڑھانا ہے۔
چیٹ جی پی ٹی گو میں اس اے آئی چیٹ بوٹ کے مفت ورژن کے تمام فیچرز کے علاوہ زیادہ تصاویر بنوانے، فائل اپ لوڈز، ایڈوانسڈ ڈیٹا اینالسٹس اور دیگر فیچرز صارفین کو دستیاب ہوں گے۔
کمپنی نے بتایا کہ اس کے علاوہ اے آئی چیٹ بوٹ کے مفت ورژن کے مقابلے میں چیٹ جی پی ٹی گو میں صارفین کے لیے چیٹ اور ٹولز کی لمٹ (Limit) بھی زیادہ ہوگی۔
پاکستان میں چیٹ جی پی ٹی گو کی ماہانہ فیس 1400 روپے (لگ بھگ 5 ڈالرز کے قریب) رکھی گئی ہے۔
اس کے مقابلے میں چیٹ جی پی ٹی پلس کی ماہانہ فیس 5700 روپے، چیٹ جی پی ٹی پرو کی 49 ہزار 900 روپے جبکہ بزنس پلان کی 8499 روپے ہے۔
2022 میں متعارف کرائے جانے کے بعد سے دنیا بھر میں چیٹ جی پی ٹی کا استعمال بہت زیادہ بڑھا ہے اور اس کے ماہانہ صارفین کی تعداد 80 کروڑ سے زائد ہوچکی ہے۔
اوپن اے آئی کے مطابق مئی 2025 میں ترقی یافتہ ممالک کے مقابلے میں کم آمدنی والے ممالک میں اے آئی چیٹ بوٹ کے استعمال کی شرح 4 گنا زیادہ تھی۔
