راولپنڈی:انسداد اسمگلنگ آپریشنز کے دوران 10 کروڑ روپے سے زائد مالیت کی منشیات پکڑی گئی۔
ترجمان اینٹی نارکوٹکس فورس کے مطابق ملک بھر کے مختلف شہروں میں منشیات اسمگلنگ کے خلاف اے این ایف حکام کا کریک ڈاؤن جاری ہے، اس دوران 7 مختلف کارروائیوں میں 6 ملزمان کو گرفتار کرکے 10 کروڑ روپے سے زائد مالیت کی 69.640 کلو گرام منشیات برآمد کرلی گئی۔
تعلیمی اداروں میں کارروائیاں
اے این ایف حکام نے رنگ روڈ پشاور کے قریب ملزم کے بیگ سے 2 کلو چرس برآمد کی۔ اسی طرح اسلام آباد میں ہوٹل کے قریب ملزم کے قبضے سے 1.8 کلو چرس برآمد ہوئی جب کہ اٹک میں یونیورسٹی کے قریب ملزم سے 840 گرام چرس برآمد کی گئی۔
گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف کیا ہے۔
دیگر کارروائیاں
اینٹی نارکوٹکس فورس نے کچلاک بائی پاس روڈ کوئٹہ کے قریب اسمگلنگ کے لیے چھپائی گئی 58 کلو ہیروئن برآمد کرلی۔ اُدھر ایم ون موٹر وے اسلام آباد کے قریب کار کے خفیہ خانوں میں چھپائی گئی 4.8 کلو چرس، ایک عدد پستول بمعہ 8 راؤنڈ برآمد کرکے ملزم کو گرفتار کرلیا۔
علاوہ ازیں ایم ون موٹر وے اسلام آباد پر ایک دوسری کارروائی میں ملزم سے 1.2 کلو چرس برآمد کی گئی۔ اسی طرح ڈیرہ اسماعیل خان میں بائی پاس روڈ کے قریب ملزم سے ایک کلو آئس برآمد ہوئی۔
تمام کارروائیوں میں گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔