لاہور: پنجاب وائلڈلائف حکام نے لاہور سفاری زو کو بند کرنے کا فیصلہ کیا ہے۔
سفاری زو کو 11 مارچ سے 15 روز کے لیے بند کرنے کا فیصلہ کیا گیا ہے، تاکہ ضروری تعمیراتی کام، سالانہ مرمت اور دیکھ بھال مکمل کی جا سکے۔ ترجمان وائلڈ لائف اینڈ پارکس پنجاب کے مطابق سفاری زو کی بہتری کے لیے جاری کاموں کو مقررہ مدت میں مکمل کر لیا جائے گا تاکہ زو کو عید سے قبل دوبارہ عوام کے لیے کھولا جا سکے۔
ترجمان کا کہنا تھا کہ مرمت اور تعمیراتی کام کے ساتھ ساتھ زو میں موجود تمام جانوروں کا مکمل طبی معائنہ بھی کیا جائے گا تاکہ ان کی صحت کو یقینی بنایا جا سکے۔ سفاری زو کی بندش کے دوران انتظامیہ یہ یقینی بنائے گی کہ جانوروں کو بہترین دیکھ بھال اور سہولیات فراہم کی جائیں۔
واضح رہے کہ سفاری زو میں بہتری کے کام وقتاً فوقتاً کیے جاتے ہیں تاکہ جانوروں کے لیے موزوں ماحول اور عوام کے لیے بہتر تفریحی سہولیات فراہم کی جا سکیں۔ حکام کا کہنا ہے کہ 15 روز کے اندر تمام ضروری اقدامات مکمل کر لیے جائیں گے اور سفاری زو کو مزید بہتر حالت میں عوام کے لیے کھول دیا جائے گا۔