اسلام آباد:درجہ حرارت بڑھنے لگے جس کے باعث گلئیشرز پگھلنے سے ڈیمز میں پانی کی آمد کا امکان پیدا ہوگیا، 24 گھنٹے کے دوران 3 بڑے ڈیمز میں پانی کا ذخیرہ 16 ہزار ایکڑ فٹ تک بڑھ گیا۔
واپڈا حکام کے مطابق کئی ہفتوں سے ڈیڈ لیول پر موجود تربیلا میں پانی کے ذخائر میں معمولی بہتری آئی ہے، تربیلا ڈیم میں پانی کا لیول 1410.32 فٹ تک کی سطح پر آگیا جس کے بعد آج تربیلا ڈیم میں پانی کا ذخیرہ 85 ہزار ایکڑ فٹ ہے۔
واپڈا حکام کے مطابق منگلا ریزروائر میں معمولی بہتری سے پانی کی سطح 1092.30 فٹ ہے، منگلا ڈیم میں پانی کا ذخیرہ 2لاکھ 65 ہزار ایکڑ ٖفٹ ہے، چشمہ میں پانی کی سطح 642.00 فٹ ذخیرہ 63 ہزار ایکڑ فٹ ہے، تینوں ڈیمز میں پانی کا مجموعی ذخیرہ 4 لاکھ 13 ہزار ایکڑ فٹ ہے۔
واپڈا حکام کا کہنا ہے کہ ڈیمز میں گزشتہ سال کے مقابلے پانی کی سطح تاحال خطرناک حد تک کم ہے، تینوں ڈیمز میں گزشتہ ہفتوں کے مقابلے صورتحال معمولی بہتر ہوئی ہے۔
حکام کے مطابق دریائے سندھ میں آج پانی کی آمد 22 ہزار 600، اخراج 20 ہزار کیوسک ہے، دریائے جہلم میں پانی کی آمد 24 ہزار اخراج 15 ہزار کیوسک ہے، چشمہ بیراج میں پانی کی آمد 30 ہزار، اخراج 32 ہزار کیوسک ہے، دریائے چناب میں پانی کی آمد 14 ہزار، اخراج 9 ہزار کیوسک ہے، دریائے کابل میں پانی کی آمد 18 ہزار 200 اخراج 18 ہزار 200 کیوسک ہے۔