لاہور سمیت صوبے بھر میں مشروط بسنت منانے کا اعلان، مقررہ جگہوں اور اوقات میں پتنگ بازی کی اجازت ہوگی، 18 سال سے کم عمر پتنگ بازی نہیں کر سکیں گے
لاہو ر: پنجاب حکومت کی جانب سے کائٹ فلائنگ آرڈیننس 2025ء جاری کر دیا گیا، آرڈنینس کے ذریعے لاہور سمیت صوبے بھر میں مشروط بسنت کی اجازت دیدی گئی۔ تفصیلات کے مطابق آرڈیننس کے تحت بسنت کے لئے شرائط مقرر کی گئی ہیں جن کی خلاف ورزی پر قید اور جرمانے کی سزائیں مقرر کی گئی ہیں، پنجاب میں 2001 میں پتنگ بازی پر پابندی لگی تھی پچیس سال بعد پتنگ بازی کی دوبارہ اجازت دی گئی ہے، شرئاط کے تحت اٹھارہ سال سے کم عمر بچے پتنگ بازی نہیں کرسکیں گے، خلاف ورزی پر والد یا سرپرست ذمہ دار ہوگا۔
بتایا گیا ہے کہ صرف دھاگے سے بنی ڈور سے ہی پتنگ بازی کی اجازت ہوگی دھاتی یا تیز دھار مانجھے سے بنی ڈور کے استعمال پر سخت سزائیں دی جائیں گی، قانون کی خلاف ورزی پر کم از کم تین اور زیادہ سے زیادہ پانچ سال قید اور 20 لاکھ روپے جرمانے کی سزا دی جا سکے گی، پتنگ بازی کی ایسوسی ایشنز متعلقہ ضلع کے ڈپٹی کمشنر کے پاس رجسٹر کی جائیں گی۔
معلوم ہوا ہے کہ قانون کی خلاف ورزی کی شکایت کرنے والے (Whistle blower) کی قانونی طور پر حوصلہ افزائی کی جائے گی، پتنگیں رجسٹرڈ دکانداروں سے ہی خریدی جائیں گی ہر رجسٹرڈ دکاندار کو ایک کیو آر کوڈ سے منسلک کیا جائے گا، پتنگ پر بھی کیو آر کوڈ ہوگا جس سے پتنگ بیچنے والے کی شناخت ہو سکے گی، ڈور بنانے والوں کی بھی رجسٹریشن ہوگی کیو آر کوڈ سے ان کی بھی شناخت ہوگی۔
