اسلام آباد میں جاری موسلادھار بارش کے نتیجے میں مختلف علاقے زیر آب آگئے۔
بارش کے باعث اسلام آباد کا سیکٹر جی 11 زیرآب آگیا، سڑکیں تالاب کا منظر پیش کرنے لگیں جبکہ ندی نالوں میں تغیانی آگئی۔
اسلام آباد کے سیکٹر جی 8 مرکز میں بھی گاڑیاں پانی میں ڈوب گئیں، بنی گالہ اور سری نگر ہائی وے بھی زیرآب آگئے، موسلادھاربارش کے باعث میٹرو بس کا روٹ بھی زیرآب آگیا۔
ملکہ کوہسار مری میں بھی موسلادھار بارش جاری ہے جبکہ محکمہ موسمیات نے مری میں آئندہ 24 گھنٹوں میں مزید بارشوں کا امکان ظاہر کیا ہے۔
دورسی جانب ترجمان واسا کا کہنا ہے کہ راولپنڈی، اسلام آباد میں موسلادھار بارش کا سلسلہ جاری ہے، اسلام آبادکے علاقے سید پور 40 ملی میٹر، گولڑہ میں 66 ملی میٹربارش ریکارڈ کی گئی۔
ترجمان واسا کا کہنا ہے کہ راولپنڈی میں شمس آباد کے مقام پر25 ملی میٹر، پیر ودھائی میں 35 ملی میٹربارش ریکارڈ کی گئی، راولپنڈی میں نیوکٹاریاں میں 60 ملی میٹر بارش ریکارڈ کی گئی۔
ایم ڈی واسا سلیم اشرف کے مطابق نالہ لئی میں پانی کی سطح مسلسل بلند ہونے لگی، نالہ لئی کے اطراف ہائی الرٹ جاری کردیا گیا ہے۔
نالہ لئی میں پانی کی سطح بلند ہونے پر خطرے کے سائرن بجادیے گئے ہیں، کٹاریاں کے مقام پر نالہ لئی کے قریب آبادی کو محتاط رہنے کی ہدایت بھی کردی گئی ہے جبکہ ضلعی انتظامیہ کے مطابق ریسکیو 1122 نالہ لئی کے قریب اہم مقامات پر تعینات ہے۔
ایم ڈی واسا سلیم اشرف کے مطابق واسا ہائی الرٹ پر ہے اور رین ایمرجنسی نافذ ہے، عملہ اور ہیوی مشینری فیلڈ میں موجود ہے۔
انہوں نے کہا کہ بارش کوپوری طرح مانیٹر کررہےہیں، تمام ضروری انتظامات کیےگئے ہیں، کسی بھی قسم کی ایمرجنسی صورتحال سے نمٹنے کے لیے تیار ہیں۔
