پا ک سعودی عرب دفاعی معاہدہ پر جمعہ کو یوم تشکر و یوم دعا منایا جائے گا،طاہر محمود اشرفی

لاہور:چیئر مین پاکستان علماء کونسل حافظ محمد طاہر محمود اشرفی نے کہا ہے کہ وزیر اعظم محمد شہباز شریف کا دورہ سعودی عرب انتہائی کامیاب رہا ، پاکستان اور سعودی عرب کے درمیان دفاعی معاہدے پر کل جمعہ کو یوم تشکر و یوم دعا منایا جائے گا۔ان خیالات کا اظہار انہوں نے جمعرات کو یہاں کیتھڈرل چرچ میں بشپ آزاد مارشل و دیگر اقلیتی رہنمائوں کے ہمراہ پریس کانفرنس میں کیا ۔حافظ طاہر محمود اشرفی نے کہا کہ وزیر اعظم محمد شہباز شریف کے دورہ سعودی عرب سے پاکستان کو اللہ تعالی کے فضل و کرم سے حرمین شریفین کی سکیورٹی کی سعادت ملی ہے،اس حوالے سے دفاعی معاہدہ دونوں ممالک کی اپنی قومی سلامتی کو بڑھانے،خطے اور دنیا میں سلامتی اور امن کے حصول کیلئے مشترکہ عزم کی عکاسی کرتا ہے.اس معاہدے سے امت مسلمہ کو پوری قوت ملے گی.ہمارے لئے یہ دفاعی معاہدہ اس لئے تقدس رکھتا ہے کہ اس میں حرمین شریفین کا دفاع شامل ہے۔انہوں نے کہا کہ وزیر اعظم محمد شہباز شریف،فیلڈ مارشل حافظ سید عاصم منیر اور سعودی ولی عہد محمد بن سلمان کو خراج تحسین پیش کرتے ہیں اور افواج پاکستان کو مبارک ہو کہ وہ ارض حرمین شریفین کا دفاع کرے گی۔اس موقع پر انہوں نے پاکستان اور سعودی عرب کے درمیان دفاعی معاہدہ ہونے پر پاکستان علما کونسل کے زیر اہتمام کل جمعہ کو ”یوم تشکر و یوم دعا”منانے کا اعلان کیا۔اس موقع پر صدر چرچ آف پاکستان بشپ آزاد مارشل نے کہا کہ مسیحی برادری نے قیام پاکستان کے وقت بھی اپنا کلیدی کردار ادا کیا.ملکی تعمیر و ترقی اور پاکستان کیلئے جان دینے سے گریز نہیں کیا ۔انہوں نے کہا کہ معرکہ حق کی وجہ سے پاکستان کا نام دنیا بھر میں بلندہوا،جس سے ثابت ہوا کہ پاکستان کی مسلح افواج بھر پور صلاحیت کی مالک اور اپنے سے چار گنا بڑے دشمن کا مقابلہ بہادری سے کر سکتی ہیں۔