اسلام آباد، کراچی، لاہور؛ تاجروں کی کال پر ہڑتال کے معاملے میں آج اسلام آباد کے سوا ملک بھر میں جزوی اور مکمل ہڑتال جاری ہے۔
ذرائع کے مطابق ایف بی آر کو دیے گئے اضافی اختیارات کے خلاف ہڑتال کی کال پر تاجر دو دھڑوں میں تقسیم ہو گئے، جس کے بعد آج وفاقی دارالحکومت اسلام آباد میں کاروبار زندگی معمول کے مطابق جاری ہے اور تمام بڑی مارکیٹیں و اسٹورز کھلے ہیں۔
دوسری جانب کراچی سمیت ملک کے دیگر چھوٹے بڑے شہروں میں کاروبار جزوی و مکمل طور پر بند ہے ۔
کراچی چیمبر آف کامرس اینڈ انڈسٹری کے صدر جاوید بلوانی نے کہا ہے کہ آج کی ہڑتال کے فیصلے پر قائم ہیں۔ حکومت نے ہمیں تحریری یقین دہانی نہیں کرائی، اس لیے ہم نے ہڑتال کا فیصلہ برقرار رکھا ہے۔
انہوں نے کہا کہ اگر آئندہ میٹنگ تک مطالبات پر کوئی تحریری عملدرآمد نہ ہوا تو احتجاج کا دائرہ بڑھایا جائے گا۔ جوڑیا بازار، الیکٹرانکس و موبائل مارکیٹ، فروٹ و سبزی منڈی اور دیگر کاروباری مراکز آج بند رہیں گے۔ انہوں نے بتایا کہ آل پاکستان ریسٹورنٹس ایسوسی ایشن اور شہر کی ٹرانسپورٹ تنظیموں نے بھی ہڑتال کی حمایت کا اعلان کیا ہے۔
دریں اثنا لاہور چیمبر آف کامرس کی جانب سے ہڑتال کی حمایت کی گئی ہے اور انجمن تاجران کے تمام گروپ ہڑتال میں شریک ہیں، جس کے نتیجے میں صوبائی دارالحکومت میں تمام مارکیٹیں بشمول اندرون شہر میں شاہ عالم مارکیٹ، اکبری منڈی، رنگ محل وملحقہ مارکیٹیں، انار کلی، مال روڈ، ہال روڈ، میکلوڈ روڈ، منٹگمری روڈ کی مارکیٹوں میں بھی شٹر ڈاؤن ہے۔
اسی طرح سمن آباد، اچھرہ، عابد مارکیٹ،الیکٹرانکس مارکیٹ، گلبرگ،کینٹ، ڈیفنس کی مارکیٹیں، مغلپورہ،شالامار لنک روڈ، داروغہ والا، ریلوے روڈ، برانڈ رتھ روڈ، شاہ عالمی، رنگ محل، اعظم کلاتھ مارکیٹ ، پاکستان کلاتھ مارکیٹ، پیپر مارکیٹ، مصری شاہ، لوہا مارکیٹ، ہال روڈ، مال روڈ، بیڈن روڈ، نیلا گنبد، فیروز پورہ روڈ مارکیٹ بھی جزوی و مکمل طور پر بند ہیں۔
تاجر رہنما حاجی مقصود بٹ نے کہا ہے کہ تاجر برادری کو ہراساں کیا گیا تو ہڑتال جاری رہے گی۔ انہوں نے کہا کہ آج کی ہڑتال کامیاب ہے، تاجروں نے ثابت کردیا کہ ہم سب ایک ہیں ۔ ایف بی آر کو ناجائز اختیار دیے جارہے ہیں۔ زبردستی کا کوئی قانون قبول نہیں کریں گے۔
اُدھر حیدر آباد میں بھی آج ٹیکس مسائل، تاجروں کو ہراساں کیے جانے اور ایف بی آر کو اختیارات دیے جانے کیے خلاف جزوی و مکمل ہڑتال جاری ہے۔ اناج منڈی، گل سینٹر، تلک چاڑی روڈ، الیکٹرانکس مارکیٹ، ریشم بازار، قاضی عبدالقیوم روڈ، کینٹ بازار مکمل طورپر بند ہیں جب کہ ٹاورمارکیٹ، شاہی بازار، قائد آبادبازار، سخی پیر روڈ پر بازار جزوی طورپر کھلے ہوئے ہیں۔
اسی طرح پشاور، کوئٹہ اور دیگر چھوٹے بڑے شہروں سے بھی کاروبار مکمل یا جزوی طور پر بند ہے۔