چار سدہ؛ پولیس کی بر وقت کاروائی، کم عمر لڑکی کو اغوا کرنے والا معروف ٹک ٹاکر گرفتار

چارسدہ ; چار سدہ سٹی پولیس کی بروقت اور کامیاب کارروائی کرتے ہوئے معروف ٹک ٹاکر رضوان ولد شوکت سکنہ گلبرگ پشاور (حال ڈی ایچ اے راولپنڈی) کوگرفتار کرلیا ۔اور قید کی گئی کم عمر لڑکی بازیا ب کر لی ۔ ٹک ٹاکر نے ایک ماہ سے زائد لڑکی کو جنسی زیادتی کا نشانہ بنایا تھا۔
تفصیلات کے مطابق ملزم نے ٹک ٹاک کے ذریعے چارسدہ کی ایک کم عمر لڑکی سے رابطہ قائم کیا اور شادی کے بہانے ورغلا کر بھگا لے گیا تھا۔ ایک ماہ سے زائد لڑکی کو استحصال کا نشانہ بنانے کے بعد اسے تنہا چھوڑ دیا۔ واقعہ کی اطلاع ملتے ہی پولیس نے فوری ایکشن لیا اور متاثرہ لڑکی کو بازیاب کرا لیا۔ لڑکی نے ملزم کے خلاف باضابطہ درخواست دی۔ ڈسٹرکٹ پولیس آفیسر چارسدہ محمد وقاص خان نے واقعہ کا سخت نوٹس لیتے ہوئے ڈی ایس پی سٹی زرداد علی خان کی قیادت میں ایس ایچ او تھانہ سٹی عمران خان اور دیگر افسران پر مشتمل خصوصی ٹیم تشکیل دی۔جس نے پیشہ ورانہ حکمت عملی اپناتے ہوئے کارروائی کی اور ملزم کو گرفتار کرلیا۔ گرفتار ملزم نے دوران تفتیش جرم کا اعتراف کرلیا ہے۔جبکہ متاثرہ لڑکی کا ٹیسٹ بھی مثبت آیا ہے۔ ملزم کے خلاف مزید تفتیش جاری ہے اور قانون کے مطابق سخت کارروائی عمل میں لائی جارہی ہے۔