شکارپور میں پولیس مقابلے کے دوران 9 ڈاکو ہلاک ہو گئے جبکہ مقابلے میں دو ڈی ایس پیز زخمی ہو گئے۔
ایس ایس پی شکار پور کے مطابق شکار پور کے علاقے منچر شیخ میں ڈاکوؤں کی موجودگی کی اطلاع پر پولیس نے چھاپہ مارا تو ڈاکوؤں کی جانب سے فائرنگ کی گئی جس پر پولیس نے ڈاکوؤں کے خلاف آپریشن شروع کر دیا۔
پولیس حکام کا کہنا ہے کہ مقابلے کے دوران 9 ڈاکوؤں کو ہلاک کیا جا چکا ہے، ڈاکوؤں سے مقابلہ تاحال جاری ہے اور پولیس کی بھاری نفری موقع پر موجود ہے، ڈاکوؤں کے خلاف آپریشن میں پولیس کی بکتر بند گاڑیوں کے علاوہ ڈرون ٹیکنالوجی کا استعمال بھی کیا جا رہا ہے۔
ایس ایس پی نے بتایا کہ ڈاکوؤں کے ساتھ مقابلے میں ڈی ایس پی گڑھی یاسین ظہور سومرو زخمی اور ڈی ایس پی سٹی پارس بکرانی زخمی ہو گئے، 4 دیگر پولیس اہلکار بھی مقابلے میں زخمی ہوئے، زخمیوں کو علاج کے لیے اسپتال منتقل کر دیا گیا ہے۔
