بل بل پاکستان گیت؛ گلوکار کے اغوا کا معاملہ قائمہ کمیٹی میں پہنچ گیا

اسلام آباد: بل بل پاکستان پر گانے بنانے کا معاملہ قائمہ کمیٹی میں پہنچ گیا، کمیٹی نے گیت بنانے والے گلوکار عون علی کھوسہ کے اغوا کیے جانے کی مذمت کی۔
زرائع کے مطابق ایم این اے محمد ادریس کی زیر صدارت قومی اسمبلی کی قائمہ کمیٹی پاور ڈویژن کا اجلاس منعقد ہوا جس میں بجلی سے متعلق معاملات زیر بحث آئے۔ ساتھ ہی کامیڈین گلوکار عون علی کھوسہ کو اغوا کیے جانے کا معاملہ بھی زیر بحث آیا۔

تحریک انصاف سے تعلق رکھنے والے رکن قومی اسمبلی و قائمہ کمیٹی کے رکن ملک عامر ڈوگر نے کہا کہ پورا ملک بل بل کررہا ہے اور اگر کوئی نوجوان قوم کی ترجمانی کرے تو اسے اٹھالیا جاتا ہے، نہ ہمیں رونے دیا جاتا ہے اور نہ جینے دیا جاتا ہے۔
عامر ڈوگر نے کہا کہ محض بل بل گانا بنانے پر بندہ اغوا کرنے کا مطلب یہ ہے کہ ہمیں احتجاج بھی نہیں کرنے دیا جارہا اور اسے نوجوان کو سامنے بھی نہیں لایا جارہا۔