ممبئی: بالی ووڈ کے شہنشاہ امیتابھ بچن نے اُن لوگوں کو منہ توڑ جواب دے دیا، جو اداکار سے 81 سال کی عُمر میں بھی کام کرنے کی وجہ پوچھتے ہیں۔
‘بِگ بی’ کے لقب سے مشہور امیتابھ بچن 81 برس کے ہوگئے ہیں اور وہ اس عُمر میں بھی چاق و چوبند دکھائی دیتے ہیں، اداکار اپنی جوانی سے بالی ووڈ کو سُپر ہٹ فلمیں دے رہے ہیں اور اب بڑھاپے میں آنے کے بعد بھی اُنہوں نے اپنا کام جاری رکھا ہوا ہے۔
امیتابھ بچن اس زائد عُمر میں نہ صرف بالی ووڈ فلموں میں اپنی اداکاری کے جوہر دکھا رہے ہیں بلکہ مشہورِ زمانہ بھارتی شو ‘کون بنے گا کروڑ پتی’ میں میزبانی کے فرائض بھی سرانجام دے رہے ہیں۔
سینیئر اداکار سے ہمیشہ یہ سوال کیا جاتا ہے کہ وہ اتنے امیر ہونے کے باوجود بھی، 81 سال کی عُمر میں کام کیوں کررہے ہیں؟، اب امیتابھ بچن نے اپنے حالیہ بلاگ میں اس سوال کا جواب دے دیا ہے۔
بھارتی میڈیا کے مطابق امیتابھ بچن نے اپنے بلاگ میں لکھا کہ لوگ مجھ سے کام کے سیٹ پر میرے کام کی وجہ پوچھتے رہتے ہیں اور میرے پاس اس کا کوئی جواب نہیں ہے، سوائے اس جواب کے کہ میرے پاس کام کرنے کا ایک اور موقع ہے، یہی وجہ ہے کہ میں اس عُمر میں بھی کام کررہا ہوں۔
امیتابھ بچن نے لکھا کہ لوگ اپنی طرف سے اندازے لگا لیتے ہیں، میری نظر سے دیکھیں اور اصل وجہ جانیں، ہوسکتا ہے کہ میرے کام کرنے سے متعلق آپ جو سوچ رہے ہیں وہ صحیح ہو اور شاید نہ بھی ہو، آپ کو اپنے نتائج اخذ کرنے کی آزادی ہے اور مجھے اپنا کام کرنے کی آزادی ہے۔
اداکار نے اپنے بلاگ میں لوگوں سے سوال کیا کہ جو کام مجھے دیا گیا ہے، اگر یہی کام آپ کو ملتا تو آپ کیا کرتے؟ اگر کسی کو میرے کام کرنے سے مسئلہ ہے تو اسے چاہیے کہ وہ سیٹ پر جائے اور وجہ معلوم کرلے۔
اُنہوں نے مزید لکھا کہ آپ نے جو کہا، وہ میں نے سُن لیا، میں نے آپ کو کام کرنے کی وجہ بتا دی ہے، یہ وجہ میری ہے، بات ختم.