کراچی: پاکستان کے معروف اداکار و ٹی وی میزبان احسن خان نے اپنی گردن پر بنوائے گئے ٹیٹو کا راز کھول دیا۔
حال ہی میں ایک انٹرویو کے دوران احسن خان نے پاکستانی اداکاراؤں کے بارے میں بات کرتے ہوئے کہا کہ ہماری تمام اداکاراؤں کا تعلق اچھے گھرانوں سے ہے، سب نے شوبز انڈسٹری میں اپنا مقام بنانے کے لیے سخت محنت کی ہے۔
احسن خان نے کہا کہ ہماری اداکارائیں اپنی بےمثال اداکاری سے دُنیا بھر میں پاکستان کا نام روشن کررہی ہیں، ہمیں تمام اداکاراؤں کی قدر اور عزت کرنی چاہیے۔
اداکار نے اُشنا شاہ، مہوش حیات، کبریٰ خان، صبا قمر اور نیلم منیر کی شخصیت اور کام کی تعریف بھی کی۔
اُنہوں نے صبا قمر کے بارے میں بات کرتے ہوئے کہا کہ صبا موجودہ دور کی بہترین اداکارہ ہیں، پاکستانی لڑکیوں اور نئی اداکاراؤں کو آگے بڑھنے کے لیے صبا قمر کی زندگی اور اُن کے کام سے بہت کچھ سیکھنا چاہیے۔
اسی پروگرام میں احسن خان سے اُن کے ٹیٹو سے متعلق بھی سوال پوچھا گیا جس پر اداکار نے کہا کہ میں نے روحانیت کے طور پر اپنی گردن پر ٹیٹو بنوایا ہے۔
احسن خان نے مزید کہا کہ میں اس ٹیٹو کا مطلب نہیں بتانا چاہتا لیکن صرف یہ کہوں گا کہ اس ٹیٹو کا تعلق روحانیت سے ہے.