اسلام آباد:نائب وزیر اعظم اور وزیر خارجہ اسحاق ڈار کا کہنا ہے کہ خضدار کا واقعہ ناقابل برداشت ہے لہٰذا بھارت کی پراکسیسز باز آجائیں۔
سینیٹ میں اظہار خیال کرتے ہوئے نائب وزیراعظم اسحاق ڈار نے کہا کہ نیشنل ایکشن پلان کے کچھ حصوں پر عمل درآمد رہ گیا ہے، مستقبل کے لیے ایک کمیٹی ہو جس کے لائحہ عمل طے کرے۔
انہوں نے کہا کہ ہم نے بارڈرز کھول کر 35 سے 40 ہزار لوگوں کو آنے دیا جس وجہ سے آج صورتحال کا سامنا ہے لیکن اس فتنہ کو ختم کرنا ہوگا، جو خطے کے لیے ناگزیر ہے۔
نائب وزیراعظم نے کہا کہ کل جو خضدار میں بچوں پر حمل ہوا اس کی مذمت کرتے ہیں، یہ بہت اہم معاملہ ہے حکومت اسے سنجیدگی سے ڈیل کر رہی ہے۔
اسحاق ڈار نے کہا کہ میرے لیے اعزاز کی بات ہے کہ میں پاک افریقا دوستی کے اس اہم اجلاس کا حصہ ہوں، آج پاک افریقہ کے تاریخی و باہمی تعلقات اور دوستی کا دن ہے، پارلیمانی فرینڈ شپ گروپ نے بھی پاک افریقا تعلقات کو مضبوط بنانے میں اہم کردار ادا کیا ہے۔
انہوں نے کہا کہ پاکستان نے افریقا کو ٹیکسٹائل اور سرجیکل آئٹمز کی ایکسپورٹ کی آفر کی ہے، پبلک پرائیویٹ پارٹنرشپ کے تحت آئی ٹی اور زراعت سیکٹر میں سرمایہ کاری کرنے کی ضرورت ہے۔
نائب وزیراعظم کا کہنا تھا کہ پاکستان اور افریقا کے درمیان کیپسٹی بلڈنگ کی ضرورت ہے، پاکستان اور افریقا کی دوستی مثالی ہے۔
عرفان صدیقی
سینیٹ میں اظہار خیال کرتے ہوئے سینیٹر عرفان صدیقی نے کہا کہ اب دودھ کا دودھ اور پانی کا پانی ہو جانا چاہیے، بھارت پاکستان میں دہشتگردی کے پیچھے ہے اور پاکستان میں دہشتگردی کے لیے دہشتگردوں کو تربیت اور ہتھیار فراہم کر رہا ہے، بھارت ہمارے ہاں کلبھوشن بھی بھیجے گا اور دہشتگرد بھی پالے گا۔
انہوں نے کہا کہ یہ ناراضگی کیسی کہ حقوق کے نام پر معصوم بچوں کو ذبح کر رہے ہیں، بلوچستان میں دہشت گردوں کو کچلنا ہوگا جس پر دو رائے نہیں ہونی چاہیے۔
سینیٹر عرفان صدیقی نے کہا ک معصوم بچوں کا خون بہانے والوں کی گردنیں اڑانی چاہئیں، بھارت کو سبق مل گیا وہ ہمیں زیر نہیں کرسکتا۔ جنرل عاصم منیر کا فیلڈ مارشل بننا پوری قوم کا افتخار ہے۔
شیری رحمان
سینیٹر شیری رحمان نے کہا کہ اسکول بچوں کو اسکول جاتے ہوئے نشانہ بنایا گیا، دہشت گردی کے خلاف آپریشن کیے اور آج بھی نبرد آزما ہیں، ہم نے ہمیشہ لچک کا مظاہرہ کیا اور جارحیت پر جواب دیا، کلبھوشن یادیو کو پکڑا گیا جو اس طرح کے واقعات میں ملوث تھا۔
انہوں نے کہا کہ بلوچستان اور خیبر پختونخوا میں کئی ہماری پارٹی کے لوگ شہید ہوئے، ہم نے دہشت گردی میں محترمہ بینظیر بھٹو کو کھویا ہے۔
سینیٹر شیری رحمان نے کہا کہ ہمارے پاس بھارت کے پاکستان میں دہشت گردی میں ملوث ہونے کے ثبوت ہیں، بھارت اب تک کسی بھی واقعے کے ثبوت فراہم نہیں کر سکا، بھارت کی جانب سے عام لوگوں کو نشانہ بنایا گیا، 87 گھنٹے کی جنگ کے پہلے حملے میں بھی عام لوگوں کو نشانہ بنایا گیا، پاکستان نے جوابی وار میں فوجی اہداف کو نشانہ بنایا۔
سانحہ خضدار میں معصوم بچوں کی شہادت پر ایوان میں دعائے مغفرت کروائی گئی۔ ایوان میں سینیٹر شہادت اعوان نے دعا کروائی۔
سینیٹ میں پاک افریقا دوستی پر قردادار متفقہ طور پر منظور کی گئی۔ قرارداد نائب وزیر اعظم اسحاق ڈار نے پیش کی۔
قرارداد کے متن کے مطابق پاکستان اور افریقا آپس میں تجارت کو فروغ دے سکتے ہیں، افریقا نے ہمیشہ خطہ میں امن کی کوشش کا کردار ادا کیا ہے۔