دنیا کے مشہور ترین یوٹیوبر مسٹر بیسٹ نے ایکس پر اپنی پہلی ویڈیو سے ایک ہفتے میں ڈھائی لاکھ ڈالر سے زائد رقم کمالی۔
مسٹر بیسٹ نے سوشل میڈیا پلیٹ فارم ’ایکس‘ پر 16 جنوری کو 16 منٹ 28 سیکنڈ کی ویڈیو پوسٹ کی تھی جو تادم تحریر 156 ملین ویوز حاصل کرچکی تھی۔
مسٹر بیسٹ نے ویڈیو پوسٹ کرتے ہوئے اعلان کیا تھا کہ وہ یہ جاننے کیلئے کہ ایکس پر ایک ویڈیو پر اشتہارات سے کتنی آمدن ہوتی ہے اس ویڈیو کو ری اپ لوڈ کر رہے ہیں۔ اگلے ہفتے وہ اس سے ہونے والی آمدنی کے بارے میں سب کو آگاہ کریں گے۔
مسٹر بیسٹ نے ٹھیک ایک ہفتے بعد پیر کو ویڈیو پر ہونے والی آمدنی کا اسکرین شاٹ سوشل میڈیا پر شیئر کردیا جس کے مطابق انہوں نے اس پر 2 لاکھ 63 لاکھ ڈالر (پاکستانی 73 کروڑ روپے سے زائد) سے زائد رقم کمائی۔
مسٹر بیسٹ کا کہنا تھا کہ میرے خیال میں مشتہرین نے دیکھا کہ میری ویڈیو توجہ حاصل کر رہی ہے تو انہوں نے میری ویڈیو پر اشتہارات خریدے اور اس طرح میری فی ویو آمدنی دوسروں کے مقابلے میں زیادہ ہے۔