لاہور: فائرنگ کرکے سابقہ بیوی سمیت سسرال کے 4 افراد کو قتل کرنے والا ملزم پولیس مقابلے میں ہلاک ہوگیا۔
پولیس کے مطابق صوبائی دارالحکومت کے علاقے باغبانپورہ میں شادی کی تقریب سے واپسی پر فائرنگ کرکے 4 افراد کو قتل کرنے والا ملزم پولیس مقابلے میں مارا گیا۔ ملزم کی شناخت سلمان کے نام سے ہوئی۔
ذرائع کے مطابق پولیس ملزم کو گرفتار کرنے کے لیے محمود بوٹی کے علاقے میں گئی تھی، جہاں ملزم نے پولیس پر فائرنگ کردی اور تبادلے میں ملزم ہلاک ہوگیا۔
پولیس کا کہنا ہے کہ باغبانپورہ میں محمد فاروق نے 15 پر کال کی کہ 2 موٹر سائیکل سوار میرے گھر کے باہر فائرنگ کررہے ہیں۔ پولیس نے 2 موٹر سائیکل سوار 3 افراد کو مشکوک جانتے ہوئے رکنے کا اشارہ کیا تو پولیس کو دیکھتے ہی موٹر سائیکل سواروں نے براہ راست فائرنگ شروع کردی۔ اس دوران پولیس کی جوابی فائرنگ سے ایک ملزم سلمان ہلاک جبکہ 2 فرار ہوگئے۔
ایس پی کینٹ کے مطابق ملزم سلمان نے چند روز قبل باغبانپورہ میں 2 خواتین سمیت 4 افراد کو قتل کیا تھا۔